مبارك عليكم الشهر

مبارك عليكم الشهر

و ان شاء الله يتقبل طاعتكم

اخواني خواتي ادعو الله لي ولكم بصيام هذا الشهر و بالثبات بعد شهر رمضان

****************************************************

اختي الكريمة بنت الكويت

صدقيني اني تكدرت و ضاق خلقي على فراقج طول شهر رمضان اتمنى انج اتعيدين النظر في قرارج

صدقينتي يا اختي الكريمة ان ما نستغني عنج ولا عن مواضيعج ولا تعليقاتج

و ما ادري شنو راح يصير في

Q8DOLL

اثر غيابج

و الله انا خايف تاخذها حجة و تفطر

بنتظارج

****************************************************

طلبت مني الاخت الغالية

vancouver

اني اشتري تراجي الماس من هونكونج لام اعيالي

بصراحة انا رحت محل مجوهرات راقي وايد اعتقد ان اسمه دماس

و اول ما دشت والا اشوف الهنود و الانجليز يشترون بالهبل

من المحل اكبرت براسي قلت هذول يشترون و انا ما اشتري اهم مو احسن مني

قمت و اقلب في الخواتم الاماس و نقيت خاتم و انا قاعد اكول في قلبي جم بيطلع يعني

و لو شنو يكون سعره ما راح ابخل على ام عيالي فيه

لان بصراحة اماعيالي تستاهل كل خيرو انا عمري ما اوفيها حقها

المهم سألت عن سعر الخاتم جان اتقولي البياعة ان عندك ذوق و بصراحة اختيارك وايد حلو

الي ما اتعرفونه ان انا معرفتي بالاماس مثل معرفة ابوجهل في الكمبيوتر

المهم البياعه انفختني و انا صدقت نفسي ان عندي ذوق

و قلت لها بكم و انا حدي مصدق نفسي

جان اتقولي 900 دينار تقريبا

انا بصراحة كسرت خاطر نفسي قلت هالهنود يشترون و انا ما اشتري

قمت و طلعت من المحل و انا خاطري مكسور و اسب الهنود و اسب المحل و رحت و شريت لها بدله و شريت لها ساعتين

و جناط و انا لين الحين اسب الهنود

****************************************************

خروفة

اختي العزيزة خروفة سألت احد مشايخ الدين و قالي ان سماع صوت الحوت في رمضان يفطر

خليها بعد رمضان ما ابي اجرح صيامي

دورة الشيشة

اخواني خواتي
و اخيرا وصل وقت الدوره
بركاتج يا شيشة
ان شاء الله اليوم راح اسافر الي هونكونج و من بعدها بروح الى زياره الي صين
و ان شاء الله راح اكون متواصل معام بالنت اذا كان في انتر نت بالفندق
و الي يبي شي من الصين و هونكونج لا يتردد يكتبه بالمدونه و انا اذا رجعت الكويت ان شاء الله راح اقراه
استودعكم الله
مع السلامة

حدث في السفر

الســ عليكم ــلام

في المطار كان موجود معاي في الطيارة وزير سابق انا ما اعرفه معرفة شخصية و اول مره اشوفه بس للامانه الرجل محترم لدى الجميع
سلمت عليه و مشيت
و بعد ما وصلنا بالسلامة رحت الفندق و لا اشوف الوزير ساكن في نفس الفندق الي انا ساكن فيه
ابتسمت له و تحمد لي بالسلامة و كل واحد راح غرفته
و انتهى الموضوع مع الوزيرالسابق
و للعلم ان الفندق الي انا ساكن فيه تحته مركز تسوق كبير كل يوم انزل انا مع الاهل نتمشى فيه
و اخلي الاولاد يلعبون و المره تتسوق و انا اروح اقعد في احد المقاهي الموجوده في المجمع
وفي اول يوم لي ازور المقهى الموجود بالمجمع أصادف احد الاصدقاء راعين الدقات القشره موجود مع زوجته و اعياله في المقهى سويت نفسي ما شفته لان كنت متاكد ان راح يسوي فيني دقة اتفشل
اول ما قعدت ولا اشوف الوزير السابق داش و لانه شخص متواضع وايد سلم علي و رحب فيني و راح قعد مع وفد على ما اعتقد
المهم شويه ولا الجرسون يايب لي عصير فراوله و يقولي اهلا و سهلا نورت المقهى و هذا عصير من صاحب المقهى
انا قلت هذا اكيد شافني مع الوزير قال يبي كرت زيارة او عقد عمل انا شكو اشرب العصير الي بلاش و امشي
و ثاني يوم دخلت المقهى نفس الشي ياب لي عصير فراوله و سلم علي بحرارة شديده
و بعد شويه يوني ولد و بنتين مع امهم و اطلبوا يصورون معاي طبعا من الجنسية المصرية
و بعدها ياني صاحب المقهى و طلب ان يتصور معاي و انا فرحان في هالسالفة و اقول في قلبي لو يدرون ان مالي علاقة في الوزير شنو راح يسون المهم ما ارتحت من القعده و حبيت امشي ولا رفيجي صاحب الدقات داش اهو و زوجته
قعد زوجته في مكان و ياني يسلم علي
جان اقوله تكفة لا اتسوي شي الناس اهني يحسبوني رفيج الوزير السابق الي امس كان موجود
قالي و اهم اشعرفهم انك رفيجه قلت له ما ادري بس شافوا الوزير يسلم علي قالوا هذا مو هين و يابولي عصير فراوله بلاش
جان يموت من الضحك و طاح بالقاع فشلني و الله ضحكته مالت دوانية مو مقهى محترم
و الناس كلهم يطالعوني و هذا صاحب القهوى مصور معاي و شكله يبي يعلق الصوره بالمقهى تفشلت حدي و الله
و بعد ما ضحك و ضحك الناس علينا
قالي امس لما شفتني و صديت عني قلت حق الجرسون ان هذا فنان كويتي معروف روح قدم له عصير على حسابي
و قلت له و هذول الي صوروا معاي انا كنت احسبهم اهل الجرسون و يبون يتمصلحون مني على شان اتوسط لهم
رد يضحك بصوت عالي و مرته تضحك معاه تفشلت و الله
طلعت من المقهى و انا ويهي مقصوص و احس الكل يطالعني فشلني و الله

الســ عليكم ـــلام
اخواني خواتي شكرا لك من سأل عني في غيابي و صدقوني اني اشتقت لكم وايد
و تحسفت وايد اني ما خذيت الاب توب معاي على شان اتواصل معاكم
اشكركم من كل قلبي
بنت الكويت
salfa3ajeeba
Q8DOLL
فراوله
أم النمل
5roofa
عالية
Shaima'a Alkandari
**************************************************
و الف الحمد لله على سلامتج يا اختي عالية
و فقدناج وايد
و ما اتشوفين شر
اما بخصوص المكافأة
انا تبرعت فيها حق اللجان الخيرية
دفعت بلا
********************************************************
اختي العزيزة ام دم خفيف وايد
Q8DOLL
طلبتي مني في بوست تعدد الزوجات اعطيج الدليل عن اختلاف الايتين
اختي في كل المذاهب فسروا الايتين بهذا التفسير
و الايتين واضحين و مو محتاجين اي تفسير
شوفي الله سبحانه و تعالة قال
بسم الله الرحمن الرحيم
فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة
يعني الله سبحانه و تعالى اجاز للرجل الزواج من اربع زوجات
و ان خاف ان لا يعدل بينهم يكتفي بواحده
الخوف هنا يعني ان لا يكون عادل بالانصاف بينهم او النفقة المالية
و ذكره في الاية الثانية
بسم الله الرحمن الرحيم
ولن تستطيعوا ان تعدلوا بين النساء ولو حرصتم فلا تميلوا كل الميل فتذروها كالمعلقة و ان تصلحوا و تتقوا فان الله كان غفور رحيما

انتي كتبتي الشطر الاول من الاية الكريمة
و كان التوضيح واضح في الشطر الثاني الذي لم تذكرينه
تفسير هذه الاية في كل المذاهب السني و الجعفري و الصوفي و غيرهم ان العدل عدل المحبه ان الله سبحنة و تعالة
ينبه الرجال ان لايستطيعوا ان يعدلو بالمحبة بين الناس فلابد من وجود الافضلية لزوجه على الاخره

اتمنى اني ما تفلسفت وايد و ان كلامي واضح
و ان شاء الله ما في بدليات

انا مسافر

الســ عليكم ــلام
اخواني خواتي
انا مسافر لمدة اسبوع و راجع لكم

مديرتي و الشيشة

الســ عليكم ــلام
اشلونكم اخواني خواتي ان شاء الله تكونوا بخير وصحة و عافية
يوم الاربعاء اتصلت فيني مديرتي وقالت اذا تسمح اتيني المكتب
رحت لها و دشيت عليها عطتني مقدمه طويله و ممله عن اخلاقي و اخلاصي بالعمل
وبعد ما خلصت المقدمة و اهي مرتبكه طلعت زجارة و ولعتها
و سألتني سؤال و اهي مرتبكه حدها
المديرة : انت قلت حق منو انك شفتني اشرب شيشه بالقهوة
تبون الصج انا تخصبقت قلت لايكون اهي داشة النت وشايفة المدونه
خسرتني للابد : قلت لها مثل منو تقصدين
المديرة : ما اقصد احد بس ابي اعرف انت قلت حق منو
خسرتني للابد : ما قلت حق اي احد معانا بالدوام
استانست وطفت الزجارة و دقت على الفراش وقالت يب قهوة فرنسية حق خسرتني للابد
قلت اشوه عدا الموضوع على خير
المديرة : اوكي بره الدوام قلت حق منو
خسرتني للابد : ما قلت حق احد بس قلت حق بعض الاصدقاء بالنت
المديرة : شنو انت قايل حق الناس بالنت انك شفتني و انا اشيش
خسرتني للابد : اي بس ما قلت اسمج قلت لهم مديرتي
المديرة : وليش ما قلت حق الربع بالدوانية
خسرتني للابد : لا اتخافين الي بالنت ما يعرفوني ولا يعرفونج
المديره : الله يهداك يا خسرتني للابد انا امنتك على الشي ووعدتني ان محد يدري
خسرتني للابد : لا اتخافين صدقيني
المديره : انا اثق فيك وتفضل هذا كتاب بترشيحك لدورة خارجية
خسرتني للابد : مشكوره و ماقصرتي و اذا كان ترشيحي على شان موضوع اني شفتج اتشربين الشيشة بالقهوة انا ما ابي الدورة
طبعا انا بايق هالجملة من فلم مصري
المديره : لا و الله يا خسرتني للابد الترشيح ياي من الوزارة باسمك مو انا الي مرشحتك
تبون الصج اكبرت بعيني على صراحتها لو كان مديري ريال جان قالي انا مرشحك وانا حاربت على شان تطلع الدورة
خسرتني للابد : انتي قلت لي انج مرشحتني لدوره
المديرة : صح في دوره ثانية انا رشحتك لها بس ما اوصلت الموافقه عليها
خسرتني للابد : مشكوره و ماقصرتي
المديرة : متى راح تعزمني على الشيشة ؟
خسرتني للابد : يوم الاثنين
المديرة : اوكي
خسرتني للابد : مع السلامة
رحت مكتبي وألا الخوات الي معاي بالدوام يباركون لي على الدورة
اموت و عرف اشلون درو عن موضوع الدورة و ليش البنات ما ينخش عنهم شي
اشلون يعرفون كل اصغيره و كبيره اتصير حواليهم

الســ عليكم ــلام

من يشاهد الفيديو كليب في هذه الايام يدرك بان

نحن العرب لم

نعد مبدعين بالمقلدين للغرب

يا جماعة شنو الي قاعدين نشوفه هالايام

انا ودي اعرف شي

هالمخرج او المغني ما عندهم بنات او خوات او امهات اتشوف الي قاعدين يسونه

و الله يا جماعة شي يفشل و يخرع

ان بالنسبة لي ما شفت ولا افتكر اني راح اشوف فيديو كليب مثل هذا الفيديو

و على فكره اعتقد ان هذا التصوير بالسبعينات لاكنه روعة في كل المقايس