انا مسافر

الســ عليكم ــلام
اخواني خواتي
انا مسافر لمدة اسبوع و راجع لكم

مديرتي و الشيشة

الســ عليكم ــلام
اشلونكم اخواني خواتي ان شاء الله تكونوا بخير وصحة و عافية
يوم الاربعاء اتصلت فيني مديرتي وقالت اذا تسمح اتيني المكتب
رحت لها و دشيت عليها عطتني مقدمه طويله و ممله عن اخلاقي و اخلاصي بالعمل
وبعد ما خلصت المقدمة و اهي مرتبكه طلعت زجارة و ولعتها
و سألتني سؤال و اهي مرتبكه حدها
المديرة : انت قلت حق منو انك شفتني اشرب شيشه بالقهوة
تبون الصج انا تخصبقت قلت لايكون اهي داشة النت وشايفة المدونه
خسرتني للابد : قلت لها مثل منو تقصدين
المديرة : ما اقصد احد بس ابي اعرف انت قلت حق منو
خسرتني للابد : ما قلت حق اي احد معانا بالدوام
استانست وطفت الزجارة و دقت على الفراش وقالت يب قهوة فرنسية حق خسرتني للابد
قلت اشوه عدا الموضوع على خير
المديرة : اوكي بره الدوام قلت حق منو
خسرتني للابد : ما قلت حق احد بس قلت حق بعض الاصدقاء بالنت
المديرة : شنو انت قايل حق الناس بالنت انك شفتني و انا اشيش
خسرتني للابد : اي بس ما قلت اسمج قلت لهم مديرتي
المديرة : وليش ما قلت حق الربع بالدوانية
خسرتني للابد : لا اتخافين الي بالنت ما يعرفوني ولا يعرفونج
المديره : الله يهداك يا خسرتني للابد انا امنتك على الشي ووعدتني ان محد يدري
خسرتني للابد : لا اتخافين صدقيني
المديره : انا اثق فيك وتفضل هذا كتاب بترشيحك لدورة خارجية
خسرتني للابد : مشكوره و ماقصرتي و اذا كان ترشيحي على شان موضوع اني شفتج اتشربين الشيشة بالقهوة انا ما ابي الدورة
طبعا انا بايق هالجملة من فلم مصري
المديره : لا و الله يا خسرتني للابد الترشيح ياي من الوزارة باسمك مو انا الي مرشحتك
تبون الصج اكبرت بعيني على صراحتها لو كان مديري ريال جان قالي انا مرشحك وانا حاربت على شان تطلع الدورة
خسرتني للابد : انتي قلت لي انج مرشحتني لدوره
المديرة : صح في دوره ثانية انا رشحتك لها بس ما اوصلت الموافقه عليها
خسرتني للابد : مشكوره و ماقصرتي
المديرة : متى راح تعزمني على الشيشة ؟
خسرتني للابد : يوم الاثنين
المديرة : اوكي
خسرتني للابد : مع السلامة
رحت مكتبي وألا الخوات الي معاي بالدوام يباركون لي على الدورة
اموت و عرف اشلون درو عن موضوع الدورة و ليش البنات ما ينخش عنهم شي
اشلون يعرفون كل اصغيره و كبيره اتصير حواليهم

الســ عليكم ــلام

من يشاهد الفيديو كليب في هذه الايام يدرك بان

نحن العرب لم

نعد مبدعين بالمقلدين للغرب

يا جماعة شنو الي قاعدين نشوفه هالايام

انا ودي اعرف شي

هالمخرج او المغني ما عندهم بنات او خوات او امهات اتشوف الي قاعدين يسونه

و الله يا جماعة شي يفشل و يخرع

ان بالنسبة لي ما شفت ولا افتكر اني راح اشوف فيديو كليب مثل هذا الفيديو

و على فكره اعتقد ان هذا التصوير بالسبعينات لاكنه روعة في كل المقايس

الســ عليكم ــلام

انتقل الى رحمة الله تعالى

اخ الاخت الكريمة قماشة

ادعوا له بالرحمة و لاهله بالصبر
للهم اجعل قبره روضة من رياض الجنة . لا حفرة من حفر النار
اللهم أغفر له وارحمه واعف عنه واكرم نزله
اللهم ابدله دارا خيرا من داره . واهلا خيرا من اهله

وذرية خيرا من ذريته وزوجا خيرا من زوجه

وادخله الجنة بغير حساب

برحمتك يا ارحم الراحمين
اللهم انقله من ضيق اللحود ومن مراتع الدود الى جناتك جنات الخلود لا اله الا انت يا حنان يا منان يا بديع السموات والارض تغمد ( اخ الاخت قماشة ) برحمتك يا ارحم الراحمين

الـــ عليكم ــلام

اليوم الاخوات الي معاي بالدوام ارسلوا لي مجموعة اساله و قالوا لي جاوب عليها

الاسئله كانت حلوة و جميله حبيت اتشاركوني الاجابة

س 1 . ما الشي الذي لا يعجبك بالامرأه ؟

ج1 . غرورها و النميمة وتتبع اسرار الاخرين

س2 . ماذا يعجبك المرأه ؟

ج2 . الذي يعجبني بالمرأة طيبة قلبها وحنيتها و ثقافتها

س3 . هل تهتم بجمال المرأة و حسبها ونسبها و مالها ؟

ج3 . لا لا اهتم لان هذه الاشياء ثانوية بنسبه لي

اما طيبة القلب و الحنية هي بنسبة لي رئيسية لانه دائمة

س4 . ما ذا يعجبك بالرجل ؟

ج4 . احترامة لنفسة و احترامة للاخرين ومواقفة المشرفة وحبه لعمل الاخير

س5 . ماذا تكره بالرجل؟

ج5 . الانانية و حديثة عن نفسه

طبيعة الرجل دائما يتحدث عن نفسة ويسرد البطولات و المواقف و اهو من داخل ولا شي

س6 . احلف ان اجاباتك كله صحيحة

ج6 . و الله ان كل اجاباتي صحيحة

ودي اعرف شنو المقصود بالاسئلة ؟

!!!!!!!!!!!!!!!!!!!!!!

حب الناس

الســـ عليكم ـــلام

يوم كنت بالثانوية قالي الاستاذ عن عدة طرق لكسب حب الناس

اول طريقة ان اكون مبتسم دائما

و ثاني طريقة ان اتواضع

و ثالث طريقة ان اكون كريما

و الرابعة ان يكون كلامك جميل

و بالفعل طبقت الطرق

و نجحت نجاح كبير

ولاكن بعد عدة سنوات

اكتشفت ان هذه الطرقة لا تنفع لوقتنا الحالي

فالمبتسم دائما اصبح بنظر الناس مينون

و التواضع يخلي الناس تركب فوق راسك

و الكرام الناس تحسبك عبيط و مغفل

و ان كان لسانك طيب الناس تقول عنك كذاب و منافق

السؤال ليش الناس تغيرت و قاموا يظنون سوء النية قبل حسن النية

وليش اصبح الشخص الصادق كذاب بنظر الناس

و اصبح المثل ( الذيب ما يهرول عبث ) هوالمثل السائد

و الرسول عليه الصلاة و السلام قال

اياكم و الظن فان الظن اكذب الحديث

مبروك يا ولد بنت الكويت

الســـ عليكم ـــلام
الف مبروك تخرج ولد بنت الكويت
وعقبال الدكتوراة ان شاء الله
مساهمة بسيطة مني لاشارك اختي بنت الكويت فرحتا
اتمنى ان تعجبها لاني عملتها على عجلة من امري و بوسط زحمة الدوام و ريحة الزقاير
الاغلاط وايد بالمساهمة بس حبيت اساهم